PROVINCE OF CEBU, CORDOVA-Nasikop sa kapulisan sa Lungsod sa Cordova ang suspek sa sunod-sunod nga tulis sa lain-laing barangay sa naasoy nga dapit, human sa ilahang paglusad ug buy-bust operation.
Giila ni Police Major Micheal Gingoyon, ang hepe sa kapulisan sa Cordova ang nasikop nga si Jay-R Lopez alyas “Onom” usa ka 23 anyus , adunay kapuyo ug lumolopyo sa Brgy. Buagsong Cordova, Cebu.
Dugang pa, nga nadakpan ang suspek duol sa gipuy-an niini mismo sa mga sakop sa Drug Enforcement Unit sa Cordova Police Station uban sa pakig-alayon sa PDEA-7 diin nakuhaan kini og usa ka gamay’ng pakite sa gituohang shabu nga gigamit sa buy-bust operation ug laing 15 ka pakite nga anaa sa usa ka gramo ug usa ka 9mm caliber revolver nga adunay duha ka bala.
Gitino ni Police Major Micheal Gingoyon, nga ilang nailhan ang suspek human makita sa CCTV ang dagway niini nga mihaum sa gihulagway sa mga saksi sa krimen.
Nasayran, nga ang naasoy nga dinakpan, suspek na usab sa mga kaso sa tulis diin ang uban wala na motaho sa ilang buhatan.
Hinungdan, nga nawagtang ang kabalaka sa mga Cordovanhons human kini nga masikop.
Sa pagkakaron, ang maong suspetsado ug nasakmit nga mga ebidensiya anaa na sa Cordova Municipal Police Station alang sa detensyon ug dokumentasyon samtang ang mga nakuha nga butang gidala sa Regional Forensic Unit 7 alang sa pagsusi.
