CEBU CITY-Mipahinumdom ang Land Transportation Franchising and Regulatory Board (LTFRB) sa mga driver ug operator sa deadline sa pagkuha og special permit alang sa umaabot nga Semana Santa.
Gipahibalo ni LTFRB 7 Regional Director Eduardo Montealto, Jr., nga karun na lang Marso 21 kutob ang pag-apply og special permit alang sa mga provincial routes.
Matud pa, magamit ang maong special permit sugod sa Marso 22 hangtud na sa Abril 14 ning kasamtangan nga tuig.
Kini arun sa pag-accomodate sa mga pasahero nga manguli sa ilahang tagsa-tagsa ka mga probinsiya sa umaabot nga long holiday subay sa obserbasyon sa Semana Santa, ingon man sa ilahang pagbalik usab sa dakbayan pagkahuman sa holiday.
Samtang, gitambagan sa LTFRB ang mga bus operators nga nagtinguha nga makakuha og special permit sa pag-andam sa gikinahanglan nga mga rekisitos.
Lakip sa andamon mao ang kasamtangang LTO OR/CR sa ilang mga bus vehicle, ingon man ang valid Personal Passenger Accident Insurance Policy.
