LAPU-LAPU CITY, CEBU-Naluwas ang usa ka tuig nga bata human nahulog sa ilang balay duol sa baybayon sa Marcelo Fernan Bridge sa Barangay Pusok, dakbayan sa Lapu-Lapu.
Matud pa nga usa ka construction worker ang nakakita sa bata nga naglutaw sa tubig sa dagat ilalom sa naasoy nga taytayan.
Ug daling giluwas ang bata ug gidala sa opisina sa Regional Maritime Unit 7 diin nahimutang usab sa ilalom sa taytayan.
Dali usab kini nga gihatagan og pagtagad sa mga personahe sa RMU-7 kinsang wala na’y panimuot ug gituohang nalumos.
Dugang pa nga ilang gisusi ang vital signs sa bata ug nihimo og cardiopulmonary resuscitation o kon CPR, ingon man nga nag-anam-anam kini og ginhawa.
Basi sa inisyal nga imbestigasyon, ang inahan sa bata nagbuhat sa mga buluhaton sa balay dihang nahitabo ang insidente.
Apan, sa dihang iyang gisusi ang iyang anak, wala na niya kini makit-i ingon man nga gituohan niini nga posibleng nahulog sa dagat ang bata.
