Nagpalig-on na sa pagpangandam ang Land Transportation Franchising and Regulatory Board o LTFRB-7 alang sa umaabot nga Kalag-Kalag pinaagi sa ilang gitawag nga PLAN UNDAS 2026.
Kini subay sa nagkaduol nga selebrasyon sa kalag-kalag diin gilauman nga modaghan ang mga pasahero nga modagsa sa mga terminals aron mobiyahe paingon sa ilang tagsa-tagsa ka probinsya ug makig-uban sa ilang mga pamilya sa paghinumdom sa ilang mga minahal sa kinabuhi nga mitaliwan na sa laing kalibutan.
Lakip sa ilang mga lakang ang pagpahigayon og road-side inspections sa mga terminals aron masiguro ang kahimtang sa mga pasilidad, ang ka-competent sa mga drayber, ug ang legal nga operasyon sa mga pampublikong sakyanan.
Matod ni Eugenio P. Ibo Jr., Chief Transportation Development Officer sa LTFRB-7, ilang susihon kon ang mga drayber adunay bay hustong kwalipikasyon ug kon ang mga sakyanan awtorisado ba sa ahensya nga mobiyahe.
Gipasiugda usab ni Ibo, nga hugot nilang bantayan ang paglapas sa mga lagda sa passenger capacity, ilabina ang overloading, aron mapanalipdan ang kaluwasan sa mga pasahero nga mobiyahe pauli sa ilang mga probinsya panahon sa kalag-kalag.
Alang sa mga provincial bus, gipasiugda sa LTFRB-7 nga dili tugotan ang mga standing passengers ug ang paggamit og dugang nga lingkoranan o extension seats.
Samtang sa mga modern jeepney, adunay gitakdang gidaghanon sa mga pasahero nga gitugotan nga mag-standing busa kinahanglan gihapon nga sundon sa mga operator ug drayber ang gitakdang kapasidad sa ilang mga sakyanan.
Dugang pa ni Ibo, padayon gihapon silang makadawat og mga reklamo bahin sa overloading, ug ilang gipahinumdoman ang mga operator nga ang kaluwasan sa mga pasahero maoy ilang nag-unang prayoridad.
Dugang pa sa opisyal, andam ang LTFRB-7 nga molihok dayon sa mga reklamo ug ipatuman ang katugbang nga silot batok sa mga mapamatud-ang nakalapas sa maong mga lagda.
Tumong sa maong pagpangandam nga masiguro ang luwas, kombenyente ug komportableng pagbiyahe sa publiko panahon sa pagdaghan sa mga pasahero alang sa Kalag-Kalag.
