LAPU-LAPU CITY,CEBU-Niani og nagkadaiyang negatibong reaksyon ug suhestyon ang pagpatuman sa Dakbayan sa Lapu-Lapu og P100 nga environmental fee sugod niadtong Miyerkules, Mayo 1, 2024.
Kini human nga pipila ka mga lokal ug langyaw nga turista nga naka-book og island hopping tours sa dakbayan sa Lapu-Lapu nakahukom nga mobalhin sa lungsod sa Cordova aron malikayan ang pagbayad sa environmrntal fee.
Subay sa usa ka post ni Mark Ramas Ramirez, usa ka pump boat operator, nga adunay silay mga booking gikan sa Lapu-Lapu City ang gibalhin sa lungsod sa Cordova subay sa hangyo sa ilang mga bisita.
Nasayran nga ang P100 nga environmental fee gikolekta gikan sa tanang turista nga gustong mosalmot sa water sports ug recreational activities sama sa scuba diving, free diving, banana boat riding, jet skiing, sea-walking, parasailing, kayaking, island hopping, ug susamang mga kalihokan.
Sa pikas bahin, gitino ni Annabeth Cuizon,ang konsehal sa Dakbayan sa Lapu-lapu nga nakakolekta sila og kapin sa P80,000 ang Lapu-Lapu City Government, atol sa unang adlaw sa implementasyon alang sa koleksyon sa P100 nga environmental fee kini bisan paman sa pipila ka mga turista ug pump boat operators, ang nihatag og negatibong reaksyon kabahin niini.
Samtang sa ikaduhang adlaw sukad sa pagpatuman sa maong ordinansa, nakakolekta kini og anaa sa P60,000.
