Gibarugan sa Department of Foreign Affairs (DFA) nga ang Pilipinas wala mosulod sa bag-ong model agreement uban sa China kalabot sa Ayungin shoal.
Sa usa ka pahayag, ang DFA miingon nga wala silay kasayuran sa bisan unsang new model arrangement nga nagtumong sa embahada sa China.
Matod usab sa ahensya nga ang bisan unsang mga kasabotan o kahikayan mahimo lamang kung adunay pagtugot sa labing taas nga opisyal sa gobyerno.
Nagpakita usab ang susamang paglimod sa DND ug sa National Security Council sa giingong paglungtad sa bisan unsa nga dili pormal nga mga kahikayan sa Ayungin shoal nagpakita usab nga usa lamang ka bakak ang narrative sa China.
Kinahanglam usab nga hunongon na sa China ang pagpakatap sa maong disinformation o insinuation batok sa mga opisyal sa PH nga nagmugna og kalibog sa katawhang Pilipino ug ang tinuod nga isyu mao ang walay basehanan nga pangangkon sa China ug ang mga agresibong aksyon niini sa maong kadagatan.
Gibutyag usab sa DFA nga ang PH makugihong nangita og mga paagi aron mahupay ang tensyon sa China pinaagi sa natukod nga diplomatic channels.
Dugang pa, nga kon seryoso gyud ang China sa hustong pagdumala sa kalainan sa isyu sa kadagatan, giawhag niini ang China nga ikonsiderar ang pagdapit sa PH sa pagpatawag sa sunod nga tigom sa Bilateral Consultation Mechanism sa gilalisan nga kadagatan sa labing daling panahon.
Kini nga pamahayag sa DFA maoy tubag sa giluwatang pamahayag sa wala hinganli nga tigpamaba sa Chinese Embassy sa Manila niadtong Sabado nga giingong nagkasabot ang China ug PH pinaagi sa western command sa AFP sa giingong bag-ong modelo sa pagdumala sa sitwasyon sa Ayungin shoal niadtong sayo sa 2024.
