CEBU CITY-Giklaro sa mga reklamante nga wala’y sagol pamulitika ug igo lang nila nga gipakigbisogan ang ilang katungod isip mga trabahante sa Cebu City Hall nga nabiktima sa pagpangabuso ug pang-daog-daog.
Kini ang gibutyag ni Sybil Ann Ybañez ug duha pa ka kauban sa pakighinabi sa Bombo Newsteam.
Gani nakurat sila gipagawas nga desisyon sa Ombusdman subay sa pagkasuspenso ni Mayor Mike Rama ug sa pito pa ka kaubanan niini.
Gumikan sa nahitabo, nahimong emosyonal silang nisaysay sa ilang kasinatian ug kawad-on gumikan sa nahibiling unom ka buwan nga walay sweldo ug mihugna kini og nagkandaiyang problema ilabi na sa pinansyal.
Apan, taliwa sa kahadlok ug kabalaka, mipatigbabaw ang kalipay nga ilang nabati human nakab-ot ang dugay na nilang gitinguha nga mahatagan og hustisya ang dili makiangayon ug patas nga pagtratar kanila isip mga regular employees sa Cebu City Hall.
