CEBU CITY-Malampuson ang pag-host sa dakbayan sa Sugbo sa Central Visayas Regional Athletics Association o CVIRAA Meet 2024 niadtong Mayo 4-9, 2024.
Kini ang gipahibalo ni Police Colonel Ireneo Dalogdog, ang City Director sa Cebu City Police Office, nga “Peaceful and Succesful” ang maong usa ka semana nga sports event.
Dugang pa sa opisyal nga walay krimen o aksidente nga natala sa mga sporting venues ug billeting centers sa mga atleta ug delegado gawas nalang sa mga komon nga sports-related health and wellness emergencies sa nagkadaiyang kompetisyon.
Mapasalamaton usab si PCol. Dalogdog ngadto sa ubang police auxiliary forces nga mitabang sa dakbayan sa pagmintinar sa kaluwasan sa nasangpit nga torneyo nga gikan pa sa silingang siyudad ug probinsiya sa kabisay-an.
Human sa torneyo, padayong nangandam ang CCPO sa umaabot nga Palarong Pambansa nga ipahigayon sa dakbayan sa Sugbo sa umaabot nga Hulyo ning tuiga ilabi na ug ang CVIRAA 2024 ang nagsilbing “dry-run” sa ilang mga operasyon.
Gitumbok niini nga kung adunay mga adjustment sa ilahang habig, mas sayon nalang sa ilang han-ay ug nanghinaot ang opisyal nga malinawon usab ang Palarong Pambansa-2024.
