PROVINCE OF CEBU-Wala magtinguha nga mohatag og ‘ayuda’ si Cebu Provincial Governor Gwen Garcia bisan pa man sa pagdeklarar og state of calamity sa tibuok lalawigan niadtong Biyernes, Mayo 17.
Gipaubos sa gobernador ang tibuok probinsya sa state of calamity human makadawat og mga taho nga dako ang kadaot sa agrikultura nga mokabat sa kapin sa P176 milyones nga partial total nga kapildihan tungod sa dugay nga El Niño.
Niingon pa ang Gobernadora nga imbes mohatag og hinabang pinansyal, motutok nalang siya sa pagtabang sa mga apektadong residente, ilabina sa mga mag-uuma.
Gipasabot niya nga ang iyang pamaagi nagtumong sa paglikay sa pagpalambo sa “culture of mendicancy,” diin ang mga tawo nagsalig lang sa financial assistance o ‘ayuda’ sa gobyerno.
Ang inisyal nga report sa kadaot sa mga pananom ug kahayupan gikan sa dili mominos 32 ka local government units sa probinsiya.
Kaniadtong Mayo 17, gipahibalo sa gobernadora ang mga plano nga magpagawas usa ka executive order alang sa tibuuk nga probinsya ug palig-onon kini pinaagi sa resolusyon sa board sa Mayo 20.
Hangtod sa Mayo 16, ang partial total nga kapildihan sa agrikultura sa kinatibuk-ang luna nga 3,179.32 ka ektarya nga nagbalor sa kapin P176,000,00, nga nakaapekto sa 12,312 ka mga mag-uuma ug mangingisda.
