Patay ang 4 ka mga tawo sa Kerala, India sa dihang mibundak ang ulan sa pipila ka basin sa estado sa naasoy nga nasud.
Mao kini ang gipaambit sa Kerala State Disaster Management Authority (KSDMA), hinungdan nga ilang gipahimangnoan ang mga mananagat nga dili mosuway sa paglawig sa kadagatan tungod sa hulga sa lakat sa panahon.
Samtang, ang India Meteorological Department (IMD) nag-isyu og red alert alang sa lima ka distrito sa maong lugar.
Diin nagpasabot sa kusog ngadto sa hilabihan ka kusog nga pag-uwan nga kapin sa 20 sentimetros (cm) sulod sa 24 ka oras.
Gani, pipila na usab sa mga kabalayan ug dagkong kadalanan sa mga bahin sa Kochi, nabahaan na gumikan sa kalit nga pag-ulan, samtang ang ubos nga mga dapit sa siyudad sa Thrissur gibahaan usab.
Ang Health Minister sa Kerala nga si Veena George miingon, giablihan nila ang state control room sa health department directorate sa lungsod isip bahin sa mga paningkamot aron mapalig-on ang mga kalihokan sa pagpugong sa epidemya.
