Nisaka na sa kapin 900 ang ihap sa mga namatay tungod sa kalit nga pagbaha sa Nepal, ug dul-an 4,300 na ang gikatahong missing.
Matud sa National Disaster Risk Reduction and Management Authority (NDRRMA) sa Nepal nga dul-an 600 ka mga langyaw nga turista ug mga peregrino, ingon man mga kawani sa seguridad ug gobyerno, ang lakip sa liboan nga nawala.
Diin ang mga distrito sa Chitwan, Nawalparasi East, Nawalparasi West, ug Nuwakot ang nakaagom sa pinakadaghang namatay human ang kalit nga pagbaha ug pagdahili sa yuta mibanlas sa mga baryo daplin sa mga suba sa Bhote Koshi ug Trishuli.
Ang trahedya nagsugod niadtong Agosto 26 human ang pagkahugno sa glacial duol sa utlanan sa Tibet miresulta sa kalit nga pagbaha ug pagdahili sa yuta.
Mga 20,000 ka mga kawani sa seguridad ang gipadala uban sa 14 ka mga helikopter sa militar aron pagpahigayon sa mga operasyon sa pagpangita ug pagluwas sa kahanginan ug yuta. Kapin sa 10,400 ka mga residente ang malampusong naluwas gikan sa mga apektadong lugar.
Ang mga tigluwas nabalda usab sa grabeng kadaot sa imprastraktura, diin kapin sa 25 milya nga mga dagkong dalan, 40 ka mga taytayan nga nagbitay, ug daghang mga instalasyon sa hydropower ang nangaguba sa nasud.
