Natala sa Department of Health (DOH) ang labing una nga pagkamatay tungod sa paggamit sa vape.
Gikumpirma ni Health Assistant Secretary Albert Domingo nga usa ka 22-anyos nga lalaki ang namatay sa pag-atake sa kasing-kasing nga gisundan sa grabe nga kadaot sa baga tungod sa iyang inadlaw nga paggamit sa vape sulod sa 2 ka tuig.
Walay giitala nga komorbididad ang biktima ug gidali nalang kini sa pagdala sa emergency room niadtong 2023.
Kini gibase sa usa ka research study nga gipatik sa Respirology case reports journal sa Asian Pacific Society of Respirology ni Dr. Margarita Isabel Fernandez ug pipila ka mga doktor sa Philippine General Hospital.
Base sa pagtuon, ang biktima adunay 2 ka adlaw nga history sa kalit nga pagsakit sa dughan human sa sports activity.
Nasinati usab niya ang usa ka semana nga kasaysayan sa produktibong ubo, hemoptysis, hilanat ug pagsuka.
Dugang usab ni ASec. Domingo nga 2 ka ugat sa kasingkasing sa biktima ang nabara.
Gibutyag usab sa pagtuon nga ang biktima giingong mihimakak nga adunay kasaysayan sa pagpanigarilyo, pag-inom og alkohol o paggamit sa ginadili nga droga.
Ang pasyente usab walay nauna nga impeksyon sa covid-19.
Kalabot niini, nipasidaan ang opisyal sa DOH nga motaas ang risgo sa acute myocardial infarction ug stroke tungod sa paggamit sa e-cigarettes.
Agig tubag, gitumong sa DOH nga patas-an ang legal nga edad sa mga vape users gikan sa 18 ngadto sa 21 anyos pinaagi sa pag-amendar sa Vape Law ug paghimo sa Tobacco Illicit Trade Bill subay sa WHO Framework Convention on Tobacco Control (WHO FCTC) standards.
