Nagkasabot ang Department of Social Welfare and Development (DSWD) ug ang Department of Labor and Employment (DOLE) nga palig-onon ang proyekto nga LAWA o Local Adaptation to Water Access ug BINHI (Breaking Insufficiency through Nutritious Harvest for the Impoverished) pinaagi sa Cash-for – Trabaho.
Gani, usa ka Memorandum of Understanding ang gipirmahan sa duha ka ahensya alang sa ilang kooperasyon.
Matud pa ni DSWD Secretary Rex Gatchalian, ang Project LAWA ug BINHI maoy lakip sa mga innovation sa DSWD nga nakatutok sa paglikay sa mga epekto sa food insecurity ug kanihit sa tubig tungod sa El Niño.
Kini samtang nangandam sa posibleng epekto sa La Niña.
Ubos niini nga proyekto, ang mga komunidad mosagop sa mga estratehiya ug teknolohiya aron mapalambo ang ilang kalig-on batok sa mga panghitabo sa klima.
Gidisenyo kini aron mapadayon ang produktibidad sa agrikultura sa panahon sa ting-init ug pagdumala sa sobra nga tubig sa panahon sa kusog nga pag-ulan nga may kalabotan sa La Niña.
Gihangop ni DOLE Secretary Bienvenido Laguesma ang pakigtambayayong sa DOLE-DSWD tungod kay makabenepisyo kini sa mas daghang rural communities.
