CEBU CITY-Mukabat sa kapin Php7-milyones ang kantidad sa gituohang shabu nga na-confiscate sa mga sakup sa Drug Enforcement Unit sa Waterfront Police Station atul sa ilang gipahigayun nga buy-bust operation sa Front Blessed, Brgy. Tejero ning dakbayan sa Sugbo niadtong Lunes sa kadlawn Hunyo 17, 2024.
Ang subject sa buy-bust operation mao si Dahlia Benceno Nabua alyas ‘Daling’, hingkud ang panu-igon nga residente sa Back Blessed Brgy. Tejero ug giingong maka-dispose kini og tag tulo ka kilo sa illegal nga drugas matag semana.
Nakuha gikan kang “Daling” ang 1 ka kilo ug 30 ka gramos sa shabu, cellphone ug kwarta nga halin sa transakyon sa illegal nga drugas.
Matud pa ni Police Lt.Col. Joy Leanza, ang Deputy City Director for Operations sa Cebu City Police Office nga basi sa ilang gihimu nga imbestigasyon giingong gikan sa Abuyog, Leyte ang source ni “Daling” ug usa ka piniriso ang nagsugo niini sa pagpamaligya og giilhang shabu.
Gidugang sa naasoy nga opisyal nga gipaubos nila sa duha ka semana nga surveillance ang suspek human sila nakadawat og impormasyon nga nagduwa og illegal nga drugas ang maong suspek.
Sa Dihang gipangutana si Daling sa Bombo Newsteam kung nganung namaligya kini sa ilegal nga drugas nabilin lang kini sa tubag nga “No Comment”.
