LUNGSOD SA SIBONGA, CEBU-Nalanding sa tambalanan ang usa ka amahan ug iyang anak nga babaye dihang ang panaglalis sa pamilya misangko sa trahedya sa Lungsod sa Sibonga, habagatang bahin sa Sugbo,gahapon mga alas 9:10 sa gabii Lunes, Hunyo 17, 2024.
Giila ang suspetsadong amahan nga usa ka 52-anyos, usa ka driver samtang ang iyang gipusil mao ang iyahang 28-anyos nga anak babaye,nga parehong taga Purok 7, Brgy Lamacan, Lungsod sa Sibonga.
Nasayran sa pasiunang imbestigasyon sa Sibonga police station nga samtang naa sa sulod sa kwarto ang biktima(anak) gisulod kini sa suspetsado(amahan) sa paghangyo kaniya nga storyahon ang iyang inahan nga mopauli na sa ilahang panimalay.
Kini human nga nibiya sa ilang balay ang iyang inahan(asawa sa suspek) pipila na ka adlaw ang nakalabay kay nakakuha og barangay protection order batok sa suspek.
Sa dihang gisultihan sa biktima ang suspek nga dili na gustong mopauli ang iyang inahan, kalit lang siyang gipusil sa suspek kausa naigo ang iyang walang sampot gamit ang wala matinong kalibre sa armas ug dayong pusil sa iyang kaugalingong ulo.
Daling gidala sa tambalanan sa dakbayan sa Carcar ang amahan nga anaa na sa talandugon nga kahimtang.
Gidala usab ang anak babaye sa suspetsado sa Deiparenie Community Hospital sa mga mi responde nga mga personnel sa Municipal Disaster Risk Reduction and Management Office.
