Sunog sa Brgy Pusok, dakbayan sa Lapu-Lapu, mukabat ang danyos sa kapin P4.2-milyones

LAPU LAPU CITY-Mokabat ngadto sa P4.2 milyones nga kantidad sa mga kabtangan ang niulbo sa sunog sa Sitio Upper Matumbo, Barangay Pusok, ning dakbayan sa Lapu-Lapu pasado alas 11:30 sa buntag niadtong Martes, Hunyo 18, 2024.

Giingong nagsugod ang sunog sa panimalay ni Letecia Azucenas.

Giisa sa first alarm ang sunog alas 11:49 sa buntag ug gideklarar kini nga fire out alas 12:24 sa udto matod pa sa mga kabomberohan sa Lapu-Lapu City Fire Station.

Usa sa mga mirespondeng bombero ang nakaangkon og first-degree burn sa iyang wala nga kamot sa pag sulong sa maong sunog.

Matod pa ni Fire Officer 1 Rowel Brañanola ang kinsa fire investigator sa Lapu-Lapu City Fire Station nga padayon pa nilang gisusi ang hinungdan sa sunog sa maong dakbayan.