CEBU CITY-Gimandoan ni Cebu City Acting Mayor Raymond Alvin Garcia kaniadtong adlaw sa Martes, Hunyo 18, 2024, ang pagsuspenso sa alokasyon sa gasolina sa tanang mga sakyanan sa Cebu City Hall ug sa mga barangay sa dakbayan sa Sugbo.
Kini human nitumaw ang pamasangil nga adunay pagpangawat sa gasolina sa mga sakyanan sa Cebu City Disaster Risk Reduction and Management Office (CCDRRMO).
Giinggong may mga kawani sa City Hall nga nipirma og affidavit aron pagpamatuod niini ng anomaliya, butang nga wala palabya ni Garcia.
Matod pa ni Garcia nga gipaubos dayon sa imbestigasyon ang maong kakulian sa Human Resource Development Office ug sa City Legal Office ang maong pasangil.
Dugang pa ni Garcia nga ang maong pagpahunong sa subsidy naglakip sa alang sa mga sakyanan sa mga barangay, apan ang ilang mga pang-emergency nga mga sakyanan dili maapektaran niini.
Mamahimong moduso og suwat ang nagkadaiyang mga buhatan nga apektado sa bag-ong mando ni Acting Mayor Garcia aron paghangyo ug pagpamatuod nga kinahanglan gyud nila ang gasolina gikan sa kagamhanan sa siyudad.
Samtang sa laing bahin, kahinumduman nga gipadayag ni Cebu City Councilor Pastor Jun Alcover kaniadtong adlaw sa Martes, Hunyo 18, ang pasangil sa kurapsyon sa CCDRRMO tungod sa mga pipila ka mga whistleblowers nga miduol sa iyang buhatan aron mapa-imbestigahan ang maong binuhatan sa departamento.
Kung tali sa umaabot nga session sa City Council, mupasang-at og resolusyon si Alcover kabahin niini.
