CENTRAL VISAYAS-Kapin sa 2,000 ka mga polis ang giandam sa Police Regional Office (PRO 7) alang sa seguridad sa umaabot nga Palarong Pambansa, nga ipahigayon sa dakbayan sa Sugbo gikan Hulyo 6 hangtod 17, 2024.
Matod ni Police Lieutenant Colonel Gerard Ace Pelare, ang tigpamaba sa PRO 7, nga mosaka ang gidaghanon sa mga police deployment kon dugangan pa ang mga venue sa mga sporting events.
Gipaniguro sa PRO 7 nga hapsay ang tanan sa maong kalihukan.
Gawas sa Palarong Pambansa, si Pelare nagkanayon nga nangandam na usab sila sa paghatag og seguridad alang sa National Schools Press Conference, nga ipahigayon sa dakbayan sa Carcar gikan sa Hulyo 8 ngadto sa Hulyo 12, ug sa National Festival of Talents, diin ang dakbayan sa Naga ipahigayon isip host gikan sa Hulyo 7 hangtod Hulyo 11.
Gipasalig ni Pelare nga naanad na ang kapolisan sa Central Visayas sa pagdumala sa dagkong mga panagtapok sama niini.
Si Pelare namahayag nga ang PRO 7 nakig-alayon na sa Departament of Education ug Armed Forces of the Philippines aron masuta pa ang mga isyu nga kinahanglang sulbaron aron magmalampuson ang mga kalihokan.
