CEBU CITY-Human sa pag-antos sa grabeng kainit ang nasud, misunod na usab ang problema sa baha tungod sa mga pag-uwan ilabi na ang dakbayan sa Sugbo.
Gani, sa wala pa nahuman ang El Niño nag-anam-anam na og pagpangandam ang kagamhanan sa Sugbo alang sa La Nina pinaagi sa pagpanglimpyo sa mga kasapaan sa dakbayan apan, dili gihapon kini igo ug dili mamintinar.
Tungod nagpabilin kining hagit sa syudad gumikan usa kini sa mga hinungdan sa pagbaha.
Matud pa ni City Councilor Joel Garganera nga ang mga basura nga gikan sa ibabawng bahin sa dakbayan mopaingon sa ubos ug maoy nakaingon nga mo-stuck up kini og mosangpot sa pagsaka sa tubig baha.
Hinungdan nga nakahukom ang opisyal nga patas-an ang multa sa mga masakpan nga magpataka og labay sa basura diin nagkantidad na og P3,000 hangtud sa P5,000.
Tumong niini arun madisplina o makabaton og kahadlok ang mga tawo nga magpatuyang sa ilang gibati nga molabay bisag asa.
