Gipanghimakak sa Philippine Amusement and Gaming Corp. (PAGCR) nga nipagawas kini og memorandum nga nagmando sa mga lokal nga kagamhanan sa pagpasira sa Philippine Offshore Gaming Operators (POGOs) sa unang semana sa Agosto.
Gihatagan og katin-awan ni Pagcor offshore gaming licensing department Jessa Mariz Fernandez nga peke ang maong memorandum ug wala sila’y gipagawas nga memo.
Ang maong dokumento nga giingong gipadala ngadto sa mga LGU sa Metro Manila niadtong Hulyo 26 kay peke nga bersyon sa memo nga iyang gipakatap niadtong Hulyo 23, usa ka adlaw human sa SONA sa PBBM.
Kini ang iyang sulat alang sa mga Internet Gaming Licensees ug service providers nga gipahibalo nga ang ilang operasyon mahimong magpabilin nga status quo samtang naghulat sa pagtapos sa mga detalye o sa proseso sa pag-ban sa mga POGO.
Dugang pa niini nga klaro ang direktiba sa Presidente hangtod sa katapusan sa tuig nga hingpit nang ihunong ang operasyon sa tanang POGO ug ila kining sundon.
Gitataw usab sa opisyal sa Pagcor nga tataw nga disinformation kini nga gitumong sa pagmugna og kagubot ug kalibog.
Ug gihimug-atan nga ang nagpaluyo sa maong pagpakatap og peke nga impormasyon kay tataw nga adunay tago nga motibo, busa mangayo sila og tabang sa NBI aron masusi ang ilang motibo.
