METRO MANILA-Giinsister ni kanhi Philippine National Police (PNP) chief Police General Oscar Albayalde nga wala niya makita ang pangalan ni Presidente Ferdinand Marcos Jr., sa kanhi drugs watchlist sa niaging Duterte administration.
Kahinumduman nga ang maong watchlist naglakip sa mga opisyal sa gobyerno, PNP generals, ug uban pang high-profile nga personalidad.
Matud ni Albayalde nga baga kaayo ang listahan sa iyang pagkakita niini.
Ug wala usab siya’y kopya niini, sa dihang wala pa siya nagretiro.
Si Albayalde mao’y ikaduhang Police General ubos ni kanhi PRRD, sunod kang kanhi PNP Chief ug karon Senador Ronald Dela Rosa.
Kahinumduman usab nga nahimong kontrobersiyal ang giingong kalambigitan ni PBBM sa ilegal nga drugas human giingong nagpakita ang usa ka video sa usa ka indibidwal nga susama og dagway ni Marcos nga naggamit og ilegal nga drugas.
Ingon man nga giila sa PNP ug sa National Bureau of Investigation nga peke ang maong video.
