CEBU CITY-Nipadayag sa ilang suporta ang labor group sa Kabisay-an sa lakang sa kagamhanan sa pagpausbaw sa suholan sa mga empleyado ug niawhag sa mga magbabalaod sa pagpasar og mga pending nga balaodnon nga nagtumong sa pagpasaka sa inadlaw nga minimum wage tungod sa pagsaka sa gasto sa panginabuhi.
Mao kini ang gipaambit ni Jaime Paglinawan, ang head sa Sugbo-Kilusang Mayo Uno atol sa pakighinabi sa Bombo Radyo Cebu.
Apan, pangutana niini kay kung igo naba kini nga makatubag sa grabeng nagkataas nga presyo sa mga panaliton.
Ingon man nga kinahanglan nga subayan sa mga batakang balaod arun maingon nga makabuhi na ang suholan, ilabi na nga nakita nila nga adunay kapasidad ang gobyerno nga makahatag pa og mas labaw niini ug motugma sa panginahanglanon sa katawhan.
Subay niini, gituohan sa labor group nga Partido Mangagawa nga mahimo nga makakuha og P20 nga usbaw sa suholan ang Sugbo.
Diin ang P20 nga posibleng usbaw kay ihatag sa Regional Tripartite Wage and Productivity Board (RTWPB) alang sa mga trabahante sa Sugbo human ang Metro Manila wage board kay mihatag lang og P35.
Una niini, si RTWPB -7 chairperson Lilia Estillore miingon nga posibleng moabot ang usbaw sa suholan sa Oktubre ning tuiga apan, wala niya gibutyag kung pila tungod kay ang kantidad gitino pa sa board pagkahuman sa public hearing.
