MANDAUE CITY-Giimbitar isip guest of honor sa groundbreaking ceremony sa One-Stop Shop Government Center si suspended Mandaue City Mayor Jonas Cortes nga tukoron sa City Government sa nahisgutang dakbayan.
Kabahin kini sa 55th Charter Day Celebration nga gipahigayon kagahapon, Huwebes, Agosto 29, 2024.
Kauban niya si Acting Mayor Glenn Bercede ug mga konsehal sa dakbayan diin nagtimaan sa importanteng higayon sa mga plano sa kalambuan sa ilang siyudad.
Ang bag-ong government center, nga maghiusa sa tanang departamento sa city hall ubos sa usa ka atop, nagrepresentar sa dakong lakang sa unahan sa Mandaue City.
Ang proyekto gigastohan pinaagi sa P3 bilyones nga utang sa Development Bank of the Philippines nga gipanag-iya sa estado ug tukoron sa dapit sa kanhi Cebu International Convention Center (CICC).
Sa pakigpulong sa suspendidong mayor, iyang gipasalamatan dili lang ang mga tigpaluyo sa iyang ngan kon dili lakip na ang mga tawo nga nagpaluyo sa kasong iyang giatubang ilabi na sa pagkasuspenso niini sulod sa usa ka tuig ug walay suweldo nga madawat.
Dugang pa niya nga kini nga proyekto mas makatampo sa panglantaw sa iyang administrasyon nga mas molambo pa ang serbisyo publiko sa tanang residente sa dakbayan.
