Niluwat og mga pamahayag ang mga kanhi hepe sa Philippine National Police (PNP) nga nanghimakak sa bisan unsang kalambigitan sa bag-ohay nga mga alegasyon nga usa kanila nitabang sa grupo ni Alice Guo sa paglayas sa nasud.
Ang mga kanhi opisyal sa kapulisan gipasanginlan usab nga nalambigit sa payola gikan sa Philippine Offshore Gaming Operators (POGO).
Kung diin ang mga hepe sa PNP nga nipagawas og mga pamahayag naglakip ni PGen. Oscar Albayalde, PGen. Rodolfo Azurin, ug PGen. Benjamin Acorda Jr.
Si Albayalde namahayag nga wala siya makaila kang Alice Guo ug wala pa gyud siya makasugat sa kanhi mayor.
Samtang si Azurin iyahang gihagit ang opisyal sa Pagcor nga si Gen. Raul Villanueva sa paghingalan sa indibidwal nga iyang giangkon nga mitabang sa grupo ni Guo.
Gipadayag ni Acorda Jr.,nga dili makiangayon ang pagbasol sa mga kanhi opisyal nga wala’y nahimo nga daotan.
Subay sa inisyal nga pahayag karon ni PNP Chief PGen. Rommel Francisco Marbil, imbestigahon sa kapolisan ang katinuod sa pangangkon ni Villanueva.
Apan, kung dili kini tinuod, kinahanglang manubag usab ang kanhi heneral nga kasamtangang nagtrabaho sa Pagcor.
