Mipasalig si Bise Presidente Sara Duterte nga dili siya moluwat sa iyang katungdanan.
Kini nunot sa panawagan sa pipila ka magbabalaod nga dili motambong sa diskusyon sa House of Representatives sa gisugyot nga P2-bilyones nga budget alang sa 2025 sa Office of the Vice President.
Matod niya nga dili siya mobiya tungod kay gibutang siya sa mga tawo sa katungdanan arun moserbisyo sa katawhan sa nasud.
Kasamtangang nagpaabot nalang ang OVP sa schedule sa senate plenary arun motambong, apan wala nay gilauman si Sara Duterte sa iapas nga budget tungod sa pagpanghilabot sa duha ka opisyal nga sila si Speaker Romualdez ug Elizaldy Co.
Una niini, gisaway nila ni House Assistant Majority Leader Jil Bongalon ug House Deputy Speaker Jayjay Suarez sa Quezon ang Bise Presidente nga wala motambong sa diskusyon sa kamara sa budget.
Nitubag si Duterte nga dili na siya motubag sa mga komento sa mga wala’y kasinatian nga mga magbabalaod tungod kay kinahanglan niyang tubagon ang 32 milyones nga mibotar kaniya.
Nihatag usab kini og suwat ngadto kang Lanao del Sur Rep. Zia Adiong nga maoy sponsor sa gisugyot nga P2-B nga budget sa Bise Presidente niadtong 2025 diin giingong ilang gisumiter ang tanang mga dokumento ngadto sa House committee on appropriation kalabot sa budget request.
