CEBU CITY- Gikwestyon si kanhi Cebu City Police Office (CCPO) chief Royina Garma sa pipila ka mga sakop sa House of Representatives sa iyang mga “donasyon” sa party-list nga iyang namugna dihang nilingkod siya isip general manager sa Philippine Charity Sweepstakes Office (PCSO).
Si Garma, atol sa quad committee hearing sa extrajudicial killings Biyernes, Sept. 27, 2024, mikompirmar nga iyang gitukod ang STL Party-list.
Matud ni Garma nga ang STL mao ang Samahan ng Totoong Larong may Puso nga nabistong nagdawatay og pundo nga maoy makinarya sa politika sa naasoy nga partylist.
Sa pagtubag ni Garma kang Rep. Fernandez kabahin kung unsa ka tinuod ang maong panghitabo, dali nga gihimakak kini ni Garma nga nakapaulbo sa kongresista sa padayong pagpamakak niini.
Ang STL Partylist kinsa ubos sa pasilitasyon sa STL Foundation nasayran nga mitunol ug pinasyal nga ayuda sa kagamhanang dakbayan sa Mandaue nga personal nga gidwat ni Mandaue City Mayor Jonas Cortes niadtong Disyembre 2021 isip PCSO calamity assistance nga nagbalor ug P2-milyones.
Dugang pa, nga nagpahigayon usab kini ug housing project nga “Bahay mo, Puso ko” program sa dakbayan sa Sugbo sa bukirang barangay niini sa Barangay Malubog nga sa samang maniobra gikan gihapon ang pundo sa PCSO nga gipalusot sa STL Partylist/STL Foundation.
Si Fernandez nipasangil nga ang ikaduhang nominado sa party-list mao ang ig-agaw ni Garma, samtang ang unang nominado mao si kanhi Cebu City Medical Center administrator ug kanhi Calamba barangay captain Yvonne Cania-Barandog.
Si Yvonne asawa usab ni Police LtCol. Chuck Barandog, kinsa maoy aide-de-camp ni Garma.
Kahinumduman nga niadtong 2022 Presidential Elections, gi-endorso sa pipila ka mga lokal nga opisyal sa Sugbo ang STL Partylist, apan wala kini nakakuha ang igong boto aron makapasar sa threshold nga makalingkod ug posisyon sa kamara isip representative sa partylist.
