DALAGUETE, CEBU- Nipasaka na og kaso ang National Bureau of Investigation-Central Visayas Regional Office (NBI-CEVRO) batok sa Mayor sa Lungsod sa Dalaguete nga si Mayor Ronald Allan Cesante ug laing siyam(9) pa ka mga tawo niadtong Huwebes, Oktubre 9, 2024.
Kini ang gi-anusyo ni NBI-CEVRO Regional Director Atty. Rennan Augustus Oliva nga ang maong pagduso sa kaso ubos sa buhatan sa Ombudsman gahapong adlawa Biyernes Oktubre 11, 2024.
Base sa imbestigasyon sa NBI-CEVRO, nasuta nga walay safety equipment sa construction site, nga gi-operate ug gidumala sa pribadong kompaniya nga Power Frame Construction and Development Corp.
Hinungdan sa kamatayon ni Jerson Enseñales, construction worker kinsa aksidenteng natagak sa babaw nga bahin sa covered court sa Barangay Maloray sa samang lungsod niadtong Hunyo 5, 2024.
Kasong Anti-Graft and Corrupt Practices Act, Reckless Imprudence resulting in Homicide, ug Grave Misconduct ang giatubang ni Mayor Cesante uban sa laing siyam ka mga indibidwal lakip nila ni:
*Municipal engineer nga si Expedizitas Lenares
*Engineer Fernando Armecin
*Engineer Ernie Amarado
*Junior project engineer Juan Castillo
*Presidente sa pribadong kontraktor nga mi-hire kang Enseñales, Peter Paul Dy Jr.
*Bise Presidente Arthur Dy
*Treasurer Sally Lugtu
*Secretary Mary Joy Dela Cruz ug ang Staff Member nga si Henry Dy.
Matod sa NBI-7, sila nasuta nga nalambigit sa panagkunsabo nga miresulta sa kamatayon sa 21-anyos nga si Enseñales.
