Andam nga hatagan og katin-awan ni Senador Ronald “Bato” dela Rosa ang iyang nahimong papel sa war on drugs ni kanhi presidente Rodrigo Duterte.
Gihimo ni Dela Rosa ang maong pamahayag isip tubag sa panawagan ni Philippine National Police (PNP) Chief Rommel Marbil nga klaruhon ang ilang kalambigitan sa kampanya.
Matud sa senador nga uyon kini ug wala kini supak sa maong panawagan ug andam kini nga motubag sa maong hisgutanan.
Dugang niya nga ang kasamtangang Chief PNP kay mahimo niya nga magsugod sa iyang kaugalingon nga paningkamot sa pagpangita sa kamatuoran tungod kay ang PNP anaa sa receiving end sa isyu nga giatubang.
Nasayran nga ang panawagan ni Marbil nunot sa pag-angkon ni retired police colonel Royina Garma kabahin sa sistema sa pagbayad ug ganti sa pagpatay sa mga drug suspect atol sa war on drugs ni Duterte.
Ang kasamtangang hepe sa PNP miingon nga ilang gidawat kining mga alegasyon nga “seryoso kaayo” ug siguruhon ang pagkamay-tulubagon ug transparency sulod sa ilang mga han-ay.
Si Dela Rosa, kinsa maoy hepe sa PNP atol sa kataas sa drug war, una nang nanghimakak nga wala siya’y nahibaw-an bahin sa reward system sa mga pulis nga nalambigit sa anti-narcotics operation ni Duterte nga nagkanayon nga wala’y pundo ang organisasyon alang sa rewards.
