Gibalhin ang anaa sa 1,308 ka mga personahe sa Philippine National Police (PNP) nga adunay kabanay nga modagan sa midterm elections sa Mayo 2025.
Matud pa ni PNP Spokesperson Brigadier General Jean Fajardo, nga anaa sa 1,586 ka mga pulis ang nagdeklarar nga adunay kaliwat hangtud 4th degree ug anaa sa 1308 na ang na-relieve ug gibalhin sa ubang unit.
Samtang ang nahabilin nga kapin sa 200 ka mga pulis gipaabot nga ibalhin.
Sa naasoy nga ihap, nag-una ang Police Regional Office (PRO) Cordillera nga adunay 180 ka gibalhin nga pulis, gisundan sa PRO 9 (Zamboanga Peninsula) nga adunay 144, PRO Bangsamoro Autonomous Region (PRO-BAR) nga adunay 122, ug PRO 6 (Western Visayas) nga adunay 118 ka polis.
Gipasabot ni Fajardo nga usa kini ka lakang sa PNP aron mapugngan ang pagkalambigit sa kapolisan sa partisan politics.
Lakip sa ibalhin ang mga police escort nga nadestino sa mga politiko ug pribadong indibidwal nga modagan sa piniliay.
Gipasalig ni Fajardo nga magpabiling non-partisan ug patas ang PNP sa umaabot nga piniliay.
Nipasidaan usab si PNP Chief General Rommel Francisco Marbil nga dili tugotan ang paggamit sa mga polis sa pag-impluwensya sa eleksyon ug iyang gipasabot nga manubag ang mga polis nga nalambigit sa partisan activity.
