PROVINCE OF CEBU- Gi-inaugurahan na kagamhanang lalawigan sa Sugbo ang Level 3 Bulk Water Supply Project sa Barangay Saavedra lungsod sa Moalboal sa habagatang Sugbo kagahapong adlawa sa Lunes, Oktubre 28, 2024.
Gipangulohan ang pag-inaugurate ni Cebu Provincial Governor Gwendolyn Garcia uban silang Board Members Glenn Soco, Cesar Baricuatro, Loren Singco, Jerome Librando, Moalboal Mayor Inocentes Cabaron ug Vice Mayor Paz Rozgoni sa Barangay Covered Court sa naasoy nga dapit.
Ang presentasyon nagpakita sa pag-abli sa valve aron nga pagsupply og abundang presko nga tubig para sa mga mulupyo sa maong lugar.
Ang bulk water project sa Kapitolyo naghatag og mas maayo ug mas barato nga alternatibo sa tubig nga gibaligya sa mga pribadong suppliers nga maningil og P250 per cubic meters o tumbas sa lima ka drum sa tubig).
Matod pa ni Gobernador Garcia nga nipasalig ang Kapitolyo nga mopabayad og mas ubos kaysa sa lokal nga water district nga nagbayad sa mga panimalay og P11 matag cubic meter sa unang 10 cubic meters; ug P23.50 kada metro kubiko sa unang 10 ka metro kubiko sa mga establisyemento sa patigayon.
Magserbisyo kini sa kaping 8,6920 ka mga panimalay suldo sa 9 ka mga barangay sama sa Basdiot, Tubli, Poblacion West, Poblacion East, Tunga, Lanao, Bugho, ug Bala.
Ang Kapitolyo nigasto og di mominos P317 milyones sa pagtukod og water treatment facility ug reservoir; ingon man sa pagbutang sa mga pipeline nga moabot sa 63 kilometros, nga nagtugot sa tubig nga mobiyahe gikan sa tubod ngadto sa tagsa-tagsa ka panimalay.
Mao kini ang una sa daghang mga bulk water supply projects nga nahuman sa Kapitolyo, diin ang susamang uban nga gihimo pa sa 24 ka mga lungsod sa probinsya.
