MANDAUE CITY-Nagtinguha usab nga ma-disqualify ang certificate of candidacy ni Dismissed Mandaue City Mayor Jonas Cortes human nga niduso og petisyon ang duha ka mga residente sa Barangay Labogon sa Commission on Elections .
Kini nunot sa giingong sayop nga representasyon sa iyang eligibility sa iyang COC.
Matud sa mga petitioner nga si Cortes namakak nga kuwalipikado siyang modagan sa katungdanan bisan pa sa mando sa Ombudsman nga nagtaktak kaniya sa serbisyo ug nagpahamtang og silot nga perpetual disqualification.
Sa ilang petisyon, sila si Ines Corbo Necessario ug Julita Oporto Narte niingon nga si Cortes nakahimo og “material misrepresentation” sa pagdeklarar sa iyang eligibility sa COC.
Ilang gihangyo ang COMELEC nga kanselahon ang iyang COC, ug tangtangon ang iyang pangalan sa opisyal nga listahan sa mga kandidato, ug dili iapil sa mga balota alang sa May 2025 midterm elections.
