Giila ang Middle East nga “usa sa labing delikado nga mga lugar sukad para sa mga peryodista,” matod pa ni UN High Commissioner for Human Rights Volker Turk sa usa ka pamahayag kaniadtong Biyernes, Nobyembre 1, 2024.
Nagtimaan kini sa International Day to End Impunity for Crimes against Journalists nga giobserbar niadtong Nobyembre 2, ug gipasiugda nga ang mga peryodista “mao ang mga mata ug dunggan sa usa ka kalibutan nga nagdilaab, ug ang tingog sa mga biktima sa krisis.”
Matod ni Turk nga ang mga pag-atake batok sa mga peryodista nagkadaghan, ug sila “gipatay, giharas, gihadlok, gipriso o gipahilom — gikan sa Gaza ug Ukraine hangtod sa Sudan, Myanmar ug uabn pang kanasuran.”
Dugang niya nga niadtong tuig 2023, 71-ka mga peryodista ug mga trabahante sa media ang gipatay, ug kapin sa 300 ang napriso.
Samtang ang mga babaye nga tigbalita kasagarang gipunting alang sa online nga harasment nga mahimong mosangko sa pisikal nga kapintasan.
Sa partikular, ang makagun-ob nga mga panagbangi karon naghimo sa Middle East nga usa sa labing delikado nga mga lugar alang sa mga peryodista, nga nagresulta sa makapahadlok nga gidaghanon sa mga kaswalti sa mga trabahante sa media.
Ang kadaghanon labi ka taas alang sa mga peryodista sa Palestine.
Ang pagkawalay silot alang sa mga pag-atake batok sa mga peryodista “makapahuyang sa hustisya,” ug labaw pa sa “walo sa matag napulo nga pagpatay sa mga peryodista ang wala masilutan,”
Dugang ni Turk, nga nanawagan sa mga gobyerno nga buhaton ang labi pa “aron mapugngan ang mga pag-atake, pagpanalipod sa mga peryodista, ug paggukod sa mga responsable.”
