Gilagdaan ni Presidente Ferdinand R. Marcos Jr. ang 11 ka mga balaod nga nagmugna og dugang mga court branches sa nagkalain-laing dapit sa nasud.
Ang mga kopya sa bag-ong mga balaod gipagawas sa Malacañang gahapong adlawa.
Diin ang Republic Act (RA) 12044 naglatid sa pagtukod og 12 ka dugang nga regional trial court (RTC) nga mga branches sa Fourth Judicial Region nga nahimutang sa Los Baños ug Cabuyao, Laguna.
Ang mao nga balaod naglatid usab sa pagmugna og Municipal Trial Court (MTC) sa Cabuyao.
Maghimo og duha ka dugang nga RTC branch ang RA 12045 ug duha ka MTC branches sa Ninth Judicial Region nga ibutang sa Pagadian City, Zamboanga del Sur.
Gipirmahan usab ni Marcos ang RA 12046, nga maghimo og 10 ka dugang nga RTC branches ug walo ka MTC branches sa Fourth Judicial Region nga ibutang sa Antipolo City, Rizal.
Ingon man ang RA 12048, nga nagtinguha nga makamugna og upat ka trial court branch ug upat ka MTC branches sa Eighth Judicial Region nga mahimutang sa Ormoc City, Leyte; RA 12049 alang sa duha ka sanga sa RTC sa Twelfth Judicial Region nga magbase sa Tubod, Lanao del Norte; RA 12050 alang sa dugang nga MTC branch sa Tenth Judicial Region sa Malaybalay City, Bukidnon; ug RA 12051 alang sa duha ka MTC branches sa Sixth Judicial Region sa Bacolod City, Negros Occidental.
Ang RA 12052 nagtakda sa pagtukod ug tulo ka bag-ong trial court branches ug duha ka Metropolitan Trial Court branches sa National Capital Region nga ibutang sa Navotas City; RA 12053 alang sa tulo ka MTC branches sa First Judicial Region nga ibutang sa San Carlos City, Pangasinan; ug RA 12054 alang sa dugang duha ka sanga sa RTC sa Tenth Judicial Region nga magbase sa Gingoog City, Misamis Oriental.
Gipagawas usab sa media ang mga kopya sa RA 12056, usa ka akto nga nag-upgrade sa Basilan General Hospital sa Isabela City, Basilan ngadto sa Level III Hospital nga tawgon nga Basilan Medical Center, ug RA 12061 nga nagtukod og Multi-species Marine Hatchery sa Tabina lungsod sa lalawigan sa Zamboanga del Sur.
Ang Level III nga ospital kinahanglan adunay, ug uban pa, mga gimbuhaton sa pagtudlo ug pagbansay, intensive care unit, dialysis clinic ug physical rehabilitation unit.
