Gipasalig sa House Quad Committee nga padayon nilang ipasiugda ang hustisya alang sa mga biktima sa duguong drug war sa administrasyong Duterte.
Matud ni Sta Rosa, Laguna Rep. Dan Fernandez, co-chair sa Quad Comm ug chairman sa House Committee on Public Order and Safety nga serbisyo diin dungan sa paghandom sa mga pamilyang Pilipino nga nagbangutan sa pagkawala sa ilang mga kabanay, pamilya ug higala tungod sa drug war kay mipasalig kini nga ang hustisya kay dili matarog.
Gawas sa Committee Public Order and Safety, ang Quad Comm naglakip sa Committees on Dangerous Drugs, Human Rights, ug Public Accounts kay mandato niini mao ang pag-imbestigar sa extrajudicial killings, illegal drug trade, operasyon sa mga illegal Philippine offshore gaming operators (POGO) ug mga paglapas sa tawhanong katungod sa pagpatuman sa drug war ni Duterte.
Basi sa datus sa gobyerno kapin sa 6,000 ang namatay sa police operations gikan sa 2016 hangtod 2021 apan layo kini sa kapin 27,000 ngadto sa 30,000 ka kaso sa EJK, sumala sa human rights advocates ug organisasyon.
Kahinuduman sa Quad Comm hearing, gikumpirmar ni retired P/Col. Royina Garma nga makadawat og reward ang kapulisan sa pagpatay sa mga drug suspect nga mobalor og P20,000 ngadto sa P1 milyones.
Gikompirmar usab niini ang Davao Death Squad, usa ka organisasyon nga giingong nagpaluyo sa pagpatay sa mga drug suspects nga naglihok sa dihang si kanhi Presidente Rodrigo Duterte pa ang mayor sa siyudad.
Sa testimonya ni kanhi Sen. Leila de Lima ang reward system sa Davao City gipatuman ni Duterte sa tibuok nasud sa dihang nahimo siyang Presidente.
Kini matud pa ang hinungdan sa pagsaka sa ihap sa mga kaso sa paglapas sa tawhanong katungod ug extrajudicial killings.
