Giingon nga usik lang ug makauuwaw kung gani ang Philippine Health Insurance Corporation o Philhealth modugang sa ilang pundo sunod tuig tungod kay dili kini hingpit nga magamit.
Mao kini ang tubag ni Senate President Francis “Chiz” Escudero nga angay tubagon ug klarohon ang sobra nga pundo sa Philhealth samtang daghang mga Pilipino ang wala makapahimulos sa mga benepisyo niini.
Matod ni Escudero, kung mapakyas ang Philhealth sa hingpit nga paggamit sa ilang pundo ug mawad-an ang mga magbubuhis og binilyon ka pesos matag tuig tungod sa inflation, ang gobyerno kinahanglang mangitag paagi nga makagahin og nihit nga pinansyal nga mga kahinguhaan, ilabina taliwala sa grabeng hagit sa panahon nga nakahatag og kadaot sa ekonomiya.
Dugang niini nga sa inflation kat pildi na ang nasud diin 500 bilyon nga sobra sa pundo ug sa upat ka porsyento nga inflation, nga nagpasabot nga ang PhilHealth mawad-an og P20 bilyones matag tuig nga wala maghatag og serbisyo sa mga Pilipino tungod kay wala sila mogasto.
Gitataw pa ni Escudero nga ang P20 bilyones nga nawala mahimong magamit sa ubang panginahanglanon sa nasod.
Ingon man nga adunay mga programa ug proyekto sa ahensya nga kinahanglang unahon ug tun-an samtang gituki sa Senado ang P6.352 trilyon nga national budget, lakip na ang flood control initiatives nunot sa pagbaha sa Bicol region tungod sa Severe Tropical Storm Kristine.
