CEBU CITY- Gihatagan ug katin-awan ni Police Colonel Antonietto Cañete, ang City Director sa Cebu City Police Office ang kabahin sa pagkasikop ni kanhi city administrator Atty. Collin Rosell, sa Cebu City Hall niadtong Biyernes sa buntag, Nobiyembre 8, 2024.
Kung diin, atol sa press conference karung adlawa Lunes, November 11, 2024, sa Cebu City Hall, gitino ni Col. Cañete, nga gipatuman kanunay sa kapolisan ang maximum tolerance, ug ang pagkasikop ni Rosell nisunod sa gikinahanglan subay sa balaod.
Kana gumikan, kay klaro nga nakalapas si Atty. Rosell tungod sa “usurpation of authority” kay gisuwayan niya pagkuha ang gahom nga gitagana alang kang City Administrator Atty. Kristine Batucan nga walay legal nga awtoridad.
Dugang pa niini, nga isip usa ka tigpatuman sa balaod, ilahang buhaton ang gikinahanglan nga walay gipili.
Gihatagan pa niini ug gibug-aton nga basi sa balaod, walay maximum tolerance.
Hinungdan nga gipahimangno-an niini ang mga kapulisan nga kon adunay nihimo og ‘crime’ sa ilahang atubangan kinahanglang kini nga dakpon ubos sa balaod.
Sa pikas bahin, gitino ni Cebu City Mayor Raymond Alvin nga ang kapolisan igo lang nagpatuman sa balaod, kana gumikan kay si Rosell nang-ilog sa awtoridad, hinungdan nga ang warrantless arrest gihimo samtang nagpadayon ang krimen.
Kung kahinumduman, nga gidakop sa mga personahe sa Cebu City Police Office si Rosell, tungod sa usurpation of authority, human ang kanhi administrador sa dakbayan miinsister sa iyang posisyon ug nipahibawo sa pagbalik ni dismissed mayor Michael Rama.
Kauban sa kasong usurpation, nag-atubang usab si Rosell og kasong resistance and disobedience to a person in authority.
Una niini, namahayag si Atty.Rosell nga “illegal” ang pagdakop kaniya, atol sa pakighinabi kaniya sa Bombo Radyo Cebu-Newsteam sa Waterfront Police Station.
Gitataw niya nga naglingkod lang siya ug nagtuman sa iyang katungdanan isip city administrator dihang gidakop siya sa kapulisan nga walay warrant.
