Gikonsiderar sa gobyerno sa Indonesia nga ibalhin sa prisohan sa Pilipinas si Mary Jane Veloso, usa ka Pinay nga anaa sa death row.
Kini ang gipahibalo sa Legal and Human Rights Ministry sa Jakarta, nga gikonsiderar nga pinakadakong breakthrough sa 14 ka tuig nga kampanya sa pagpabalik kang Veloso sa nasud.
Gipasabot sa Indonesia nga tugotan niini ang Pilipinas nga makahimo og umaabot nga mga desisyon kalabot sa posibleng pagpahamtang og clemency kang Veloso sa higayon nga mabalhin na siya, nga mahimong maghatag og dalan sa pagbuhi sa Pinay.
Bisan kung mahatag ang hangyo nga ibalhin si Veloso sa PH, ang Filipino magpadayon sa pagsilbi sa nahabilin niyang sentensiya sa nasud ubos sa mga kondisyon nga gitakda sa hukom sa korte sa Indonesia.
Kini nga pahibalo gihimo human sa opisyal nga pagbisita ni Philippine Ambassador to Indonesia Gina Alagon Jamolin sa Coordinating Ministry for Legal, Human Rights, Immigration and Correction of Indonesia diin ang status sa kaso ni Veloso kinsa anaa na sa death row sukad niadtong 2014 mao ang nahisgutan human madakpi niadtong 2010 sa Yogyakarta Airport human nadiskubrehan ang 2.6 kilos nga heroin sa iyang bagahe.
Apan gitataw sa Pinay nga inosente siya sa pasangil batok kaniya.
Samtang, ang pribadong abogado ni Veloso ug chairperson sa National Union of People’s Lawyers, nga si Atty. Edre Olalia miingon nga ang maong kalambuan usa ka dakong kahigayonan nga madala kini pauli sa nasud ug gitawag kini nga ‘novel ug unprecedented option’.
