Gibuhian na sa Correctional Institution for Women sa Mandaluyong City Biyernes sa gabii si Mary Jane Veloso human gihatagan og absolute pardon ni Presidente Ferdinand “Bongbong” Marcos Jr.
Dala ang dokumento sa iyang absolute pardon, gipahayag ni Veloso ang iyang dakong pasalamat sa Presidente sa paglimpyo sa iyang ngalan ug sa paghatag kaniya og higayon nga makabalik ug makatabang pa sa paggiya sa iyang mga anak pagkahuman sa taas nga panahon nga wala sila magkakauban.
Gipirmahan ni Presidente Marcos ang absolute pardon ni Veloso niadtong Setyembre 24, 2026 tungod sa humanitarian nga rason.
Nahibalik sa hurisdiksyon sa Pilipinas si Veloso niadtong Disyembre 2024 gikan sa Indonesia, diin siya napahamtangan unta og sentensyang kamatayon tungod sa kaso sa drug trafficking.
Napugngan ang iyang execution pinaagi sa firing squad niadtong 2015 sa ulahing minuto human nadakpan ang babaye nga nag-recruit kaniya sa kasong human trafficking, diin gihimo si Veloso nga saksi sa maong kaso.
