Gipadayag ni Vice President Sara Duterte ang iyang hugot nga pagsaway sa mga pahayag ni President Ferdinand “Bongbong” Marcos Jr. kalabot sa mga alegasyon nga naglambigit kaniya sa China.
Matod niya, ang pagtratar sa Malacañang niini isip usa ka isyu sa seguridad sa nasod naghatag og katarungan sa paggamit sa tibuok gahom sa estado, lakip na ang mga law enforcement agencies ug pagpatuman sa balaod, aron bantayan, hasolon, ug sa katapusan, ipukan siya tungod sa mga rason nga politikal.
Dugang pa ni VP Duterte, ang mga pahayag sa Presidente nagpasabot nga ang pagnegosyo uban sa China giisip nga hulga sa seguridad sa Pilipinas, nga nagsilbing pasidaan alang sa mga negosyanteng Pilipino.
Gipasiugda usab niya nga ang dayag nga pag-akusar sa China nga nanghilabot sa internal nga mga kalihokan sa nasod usa ka maisog ug delikado nga hagit ngadto sa usa ka nasod nga adunay taas nga kasaysayan sa relasyon sa Pilipinas, nga posibleng moresulta sa seryosong mga sangpotanan sa bilateral nga relasyon.
Dugang pa, gipahayag sa Bise Presidente nga gigamit lamang ni Presidente Marcos ang isyu bahin sa China ug sa West Philippine Sea aron tabonan ang kapakyasan sa iyang administrasyon sa pagsulbad sa mga dinalian nga problema sa nasod.
Lakip sa mga kapakyasan nga iyang gihisgutan mao ang kakuwang sa pag-uswag sa kinabuhi sa mga Pilipino, ang kapakyasan sa pagpalig-on sa ekonomiya ug mga institusyon, ang kawalay katakos sa pagwagtang sa krimen ug ilegal nga droga, ingon man ang nagpadayon nga korapsyon ug kontrobersyal nga mga pag-apil sa badyet nga nakabenepisyo sa mga kaalyado sa politika.
Sa katapusan, siya nag-ingon nga walay laing madahom ang katawhan gikan sa kasamtangang liderato gawas sa dugang nga pag-antos ug kalisdanan, ug nga ang nasod anaa sa peligro ubos sa kasamtangang Presidente.
