Gisaway ni Atty. Sheila Sison, lead defense counsel ni Vice President Sara Duterte, ang pahayag ni House lead prosecutor Gerville Luistro nga mahimong mogamit na lang og ubang plataporma ang depensa aron ipresentar ang habig sa Bise Presidente.
Gihulagway ni Sison nga “unbelievable and unacceptable” o dili katuohan ug dili madawat ang maong sugyot.
Matod ni Sison, dili makiangayon nga sultian ang respondent nga mogamit na lang og ubang plataporma human migahin ang prosekusyon og 38 ka adlaw sa pagpresentar sa mga saksi ug dokumento nga, sumala sa depensa, nakadaot sa reputasyon ni Duterte.
Miinsistir usab si Sison nga ang pag-atras sa prosekusyon sa tulo ka sumbong sa impeachment, human na mapresentar ang ilang mga akusasyon ug ebidensiya, dili mahimong hatagag katarungan pinaagi lamang sa paghisgot sa interes sa publiko o sa panginahanglan nga mapadali ang proseso.
Gipasiugda sa abogado nga bisan ang prosekusyon ang adunay katungod sa pagdesisyon kon unsaon pagpadayon sa kaso, magpadayon ang depensa subay sa estratehiya nga ilang giisip nga angay.
