Nagpadayag sa iyang dakong pasalamat si Cebu Governor Pam Baricuatro ngadto kang Presidente Ferdinand “Bongbong” Marcos Jr. ug sa panggamhanan taliwala sa gilayon nga pagtubag ug pag-aksyon sa problema sa pagbaha sa lalawigan.
Sumala ni Gov. Baricuatro, nagbarog gayud sila sa ilang gihatag nga gisaad human niya gipahibalo ang nahitabong pagbaha niadtong nakalabay nga Sabado, diin nakigtambayayong ang nasyonal nga kagamhanan pinaagi sa pagbisita sa mga apektadong lugar ug paghatag og pundo aron matabangan ang pagresolba sa maong suliran.
Nagtuo ang gobernador nga pinaagi sa gipaspasang kooperasyon ug suporta gikan sa nasyonal nga kagamhanan, mas dali nga matagaan og prayoridad ug solusyon ang dugay na nga krisis sa pagbaha.
Samtang, si Mandaue City Mayor Thadeo Jovito “Jonkie” Ouano mipadayag sa iyang dakong pasalamat human sa pagbisita sa mga opisyal sa nasudnong gobyerno aron makita mismo ang tinuod nga sitwasyon sa problema sa pagbaha sa siyudad.
Sumala pa ni Mayor Ouano, sa kapin unom ka mga dapit sa Mandaue nga matag karon ug unya maigo sa pagbaha, nga dugay na nga gipangitaan og solusyon apan wala gayud matapos sulod sa pipila ka dekada. Apan pinaagi sa kasamtangang kooperasyon tali sa lokal ug nasyonal nga mga gobyerno, gilauman nga ang tubig-baha mas paspas nga mahubas kon itandi sa miaging mga tuig.
Dugang pa sa mayor, dili kini mahimo sa syudad kon sila ra usab ang molihok ug mag-inusara, hinungdan nga dako gayud ang iyang pagpasalamat sa suporta nga gihatag sa mga opisyal sa nasyonal nga kagamhanan ug mga kabanay sa pagpangalagad.
Gahapong adlawa, Agosto 11, si Public Works Secretary Vince Dizon niabot sa Sugbo aron personal nga susihon ang mga lugar nga kanunay bahaon ug susihon ang mga lokal nga babag sa drainage subay sa mga direktiba ni Presidente Ferdinand R. Marcos Jr.
