Kung pa-swertiay ang hisgutan, usa ang 50-anyos nga babaye sa Tennessee, Estados Unidos kinsang nakalinya sa death row daw ang nakaikyas sa kamatayon.
Kini gumikan conscious ug makasulti pa si death row inmate Christa Pike, pila ka adlaw human ang pakyas nga lethal injection execution, basi na sa pagkumpirmar sa iyang mga abogado, bisan pa man nga nagpabilin siyang ubos sa kritikal nga medical care sa usa ka tambalanan.
Sumala sa iyang legal team, padayon siyang gitambalan samtang nakaposas ug nakagapos sa iyang higdaanan, human napalpak ang iyang duha ka lethal injections ning miaging semana.
Si Pike gisentensiyahan og kamatayon tungod sa pagpatay kang Colleen Slemmer niadtong 1995, diin nalambigit usab ang iyang kanhi hinigugma.
Human napakyas ang execution, gidala siya sa ospital ug wala makamata sulod sa pipila ka adlaw samtang gitangtang sa mga medical staff gikan sa iyang lawas ang kemikal nga gi-inject kaniya.
Matud sa mga eksperto ug sa iyang mga abogado, wala pa’y susamang kaso nga na-dokumento diin ang usa ka piniriso nakalahutay human natupukan og lethal chemical atol sa execution.
Sumala ni Deborah Denno, criminologist ug propesor sa Fordham Law School, nakurat siya sa kahimtang ni Pike tungod kay sa ubang susamang kaso sa mga piniriso nga nakalahutay sa execution, wala gayud nakasulod ang lethal drug sa ilang ugat.
Dili pa klaro ang prognosis ni Pike ug gilauman sa iyang mga abogado nga taas pa ang iyang panahon sa recovery, samtang ang maong insidente naghatag usab og dagkong pangutana bahin sa proseso sa lethal injection ug sa kahimtang sa pamilya sa biktima nga sulod sa mga dekada nagpa-abot sa pagpatuman sa sentensiya.
