Misang-at og counter-affidavit si kanhi Department of the Interior and Local Government (DILG) Secretary ug karon Senatorial aspirant Benhur Abalos Jr. ngadto sa Department of Justice (DOJ) aron hangyoon ang pagbasura sa mga kasong kriminal ug reklamong administratiba nga gipasaka batok kaniya ni kanhi Presidente Rodrigo Duterte.
Sa gipanumpaan nga pamahayag ni Abalos, siya niingon nga walay basehanan ang mga pasangil batok kaniya ug tataw nga politikanhong motibo sa pagpanghasi kaniya, pagdaot sa iyang ngalan ug pagsaway sa iyang kinaiya.
Matod niini nga ang reklamante nga si kanhi Presidente Duterte, napakyas pagmatuod sa iyang pangangkon nga nasayod siya sa giingong binuhatan sa mga sakop sa KOJC. Busa, dili siya criminally liable ubos sa doktrina sa command responsibility tungod lang kay nagbarog siya isip DILG secretary sa dihang giingong nakahimo og mga kalapasan ang sakop sa kapulisan atol sa coordinated police operation sa maong KOJC compound sa siyudad sa Davao.
Ang reklamo sa kanhi Presidente batok kang Abalos nagsumikad sa kapin 2 ka semana nga operasyon sa kapolisan gikan niadtong Agosto 24 hangtod Septiyembre 8 aron i-serve ang warrant of arrest batok sa founder sa KOJC nga si Pastor Apollo Quiboloy.
Isip property administrator sa KOJC, gisang-at ni Duterte ang malicious mischief complaint kalabot sa pagguba sa maong property.
