CEBU CITY-Giawhag sa Cebu City Transportation Office (CCTO) ang mga shopping malls sa dakbayan sa Sugbo sa pagpahibawo sa ilang buhatan una pa ang bisan unsang planong Christmas Sales aron mapadali ang deployment sa mga traffic enforcer sa ilang tagsa-tagsa ka dapit.
Matod pa ni Raquel Arce, ang pangu sa CCTO nga ang Christmas Sales nga nagdani ug dakong panon sa mga mamalitay, sa ingon nagdugang ang gidaghanon sa trapiko sa palibot sa mall.
Dugang ni Arce nga importante nga makig-coordinate ang mga mall sa ilang buhatan ug gihangyo ang mga tagdumala sa mall nga dili magdungan nga magpahigayon og sales ug ubang promotional activities.
Sa laing bahin, aduna nay mga motorized traffic enforcers nga maoy gitahasan sa pagresponde sa mga disgrasya sa trapiko sa mga dapit nga walay gi-assign nga traffic enforcers.
Daan nang gi grupo-grupo ang mga motorized traffic enforces aron makatubag dayon sila sa mga aksidente sa trapiko.
Gawas niini, ang ubang traffic enforcers mahimo usab nga modugang sa bisan unsang mga aksidente sa trapiko, depende sa kagrabe sa aksidente.
