CHINA-TAIWAN- Nagpabiling tak-om ang China sa pagbutyag sa giingong military drill niini sa kadagatan duol sa Taiwan.
Una niini, nadiskobrehan sa mga awtoridad sa Taiwan ang giingong blockade simulation nga gihimo sa China duol sa isla, gamit ang mga barko niini sa naval ug coast guard.
Gawas sa blockade drill duol sa Taiwan, adunay laing pormasyon sa tunga-tunga sa kadagatan, tali sa Okinawa Islands sa Japan ug Northern Philippines.
Human kini gibutyag sa Taiwan, wala kini direktang tubag o gikumpirma sa China.
Hinuon, ang pinakataas nga tigpamaba sa Chinese Defense Ministry miingon nga ang People’s Liberation Army magpabilin nga supak sa kagawasan sa Taiwan.
Bisan pa niini, nagpabilin ang Taiwan nga ilang bantayan ang nagpadayon nga drill sa China.
Matod sa Taiwanese government, ila kining gikonsiderar nga hulga sa ilang seguridad ug gipasalig nila ang kaandam sa pagtubag niini kung gikinahanglan.
