CEBU CITY- Human sa malampuson nga Sinulog Grand Parade 2025 nga gisalmotan ug gisaksihan sa kapin 4-milyones ka mga tawo, nagdala usab kini og daghang basura nga gipangbilin sa mga kadalanan sa dakbayan sa Sugbo.
Matod pa sa Cebu City Department of Public Services (DPS) nga miabot sa 290 ka tonelada sa basura ilang nalimpyo atol sa Enero 19 nga kalihukan sa dakbayan.
Mas taas kini kon itandi sa Sinulog Grand Parade 2024 sa Cebu South Road Properties (SRP) nga miabot lang sa 205 ka tonelada sa basura ang nahipos.
Ang operasyon sa DPS Street Cleaning Section, kay nagsugod sa pagpanglimpyo niadtong alas 6 sa gabii sa adlaw nga Dominggo, Enero 19 og milungtod sa alas 7 sa buntag sa adlaw nga Lunes, Enero 20.
Gawas sa mga ekipo sa DPS para sa ilang operasyon kay giabagan usab sila sa mga Barangay Garbage Trucks ug Engineering Trucks nga miabot sa 85 ang ihap aron sa paglimpyo sa tibuok routa sa parada.
Dugang pa sa pamunuan sa DPS, nga labing daghang basura ilang nahipos kay sa palibot sa Basilica Minore del Sto. Niño de Cebu, Fuente Osmeña Circle, Baseline Cebu (Night Club), ug sa Colon Night Market.
Kasagaran niini kay mga plastic water bottles ug mga non-biodegradble nga mga materials.
Gawas sa DPS, nitabang usab ang mga sakop sa CESET ug PROBE sa pag-abag sa pagpanglimyo sa dakbayan nunot sa kapistahan sa Sinulog karong tuiga.
