CENTRAL VISAYAS-Tumanon sa buhatan sa Commission on Elections – Central Visayas ang dugang kausaban nga gimando gikan sa Supreme Court kabahin sa pagluwat sa Temporary Restraining Order o TRO alang sa mga kandidato nga gitangtang ang mga pangalan sa balota tungod sa giatubang nga mga kaso panahon sa umaabot nga piniliay.
Mao kini ang gipaambit ni Atty. Francisco Pobe, Regional Director sa COMELEC 7 atol sa pakighinabi sa Bombo Radyo Cebu diin sigurado kini nga tumanon ang maong mando, nga gihatagan og lima ngadto sa 10 ka adlaw sa pagresolba sa nasangpit nga isyu.
Bisan paman nga aduna na’y mga gipang-imprenta nga mga balota kay kinahanglan nila nga mobalik sa uno tungod sa mga nabalik nga pangalan.
Basi sa datos sa kaulohan nga anaa sa 6 milyones ka mga balota na ang na-imprenta apan tungod sa mga kausaban kay mamahimo nalang kini nga ibasura.
Ug sugod karong adlawa, Enero 22 kay sugdan pagbalik ang pag-imprenta sa mga balota.
Masaligon usab ang COMELEC nga makaabot sa deadline karong Abril 14 aron sa pag-imprenta sa 73 milyones ka mga official ballots alang sa midterm elections, bisan pa sa pagkalangan tungod sa temporaryo nga restraining order nga giluwat sa Korte Suprema sa mga kaso nga gipasaka sa mga kandidato.
