CENTRALVISAYAS-Mipahinumdum ang buhatan sa Department of Labor and Employment – Central Visayas (DOLE-7) sa mga employers nga tumanon ang hustong guidelines para sa holiday premium pay alang sa ilang mga empleyado nga mutrabaho inig pagsaulog sa Chinese New Year sa Enero 29, 2025.
Base sa gipirmahang lagda sa mga holiday sulod sa calendar year 2025, nadeklara ang adlaw sa Chinese New Year nga usa ka special non-working holiday hinungdan nga makadawat ang mga trabahante og dugang 30% sa ilang basic daily salary sulod sa unang walo ka oras.
Samtang dugang premium pay calculation sab ang ipahamtang sa higayong mupanso kini og overtime.
Nakabase kini sa Labor Advisory No. 1 series of 2025 nga nahisubay sa Presidential Proclamation No. 727 series of 2024 nga ma-apply niini ang “no work, no pay” alang sa mga trabahanteng dili motrabaho sa maong adlaw, gawas nalang kung aduna kiniy nilagda-an nga polisiya tali sa empleyado ug kompanya.
Matod sa DOLE-7 nga mamahimong i-report sa ilang buhatan sa higayong dili mapatuman ang holiday day premium guidelines sa adlaw sa Chinese New Year.
