CENTRAL VISAYAS-Mideploy og dugang 200 ka mga sakop sa Police Regional Office – Central Visayas (PRO-7) para sa disaster response ug supporta sa umaabot piniliay sa lalawigan sa Negros Oriental.
Nagpahigayon kini og send-off ceremony sa PRO-7 Headquarters sa Camp Sergio Osmeña Sr. sa dakbayan sa Sugbo nga gipangulohan ni Regional Director Police BGen Redrico Maranan, Biyernes Enero 31, 2025.
Nagtinguha kini sa pasalig sa kapulisan sa rehiyon nga kaluwasan sa publiko sa tibuok Central Visayas.
Ang mobilization order kay naglangkob sa 100 ka personahe gikan sa Regional Mobile Force Company (RMFB) nga gimandoan sa pag-istablisar og anti-criminality checkpoints samtang laing 100 ka personahe ang gikan sa Provincial Mobile Force Company (PMFC) nga nakatutok sa evacuation ug humanitarian efforts para sa mga bakwit nga residents sa Canlaon City.
Gihimug-atan sab ni Police BGen Maranan nga ang mga augmented forces kay adunay duha ka tahas nga mao ang paghatag og humanitarian nga hinabang ug magmentinar sa kalinaw ug seguridad sa umaabot nga eleksyon.
Gipasalig sab niini nga ang pamunuan sa PRO-7 kay makadalit sa tanang logistical support ug budgetary resources sa misyon niini sa Negros Oriental.
Giawhag sa mga awtoridad ang komunidad sa lalawigan sa pagsupporta sa ilang tahas nga adunay pakapin nga paghisgot sa mga sakop niini sa pagmentinar sa disiplina ug propesyonalismo.
