Wala makita ni National Bureau of Investigation (NBI) Director Jaime Santiago ang panginahanglan nga imbestigahan ang kill remarks ni kanhi Presidente Rodrigo Duterte batok sa daghang mga Senador.
Matod niya nga ang mga pamahayag sa kanhi Presidente atol sa kampanya sa eleksyon kay “political propaganda and retorika” lamang.
Nangatarungan usab ang kadagkoan sa NBI nga kinahanglang sabton ang mga pamahayag sa kanhi Presidente sa konteksto sa diskurso sa politika.
Gipahibalo usab ni Dir. Santiago nga ang kanhi Presidente mihimo usab sa samang pamulong atol sa iyang termino.
Matud pa sa opisyal nga sa miaging administrasyon sa dihang anaa pa si Duterte sa gahum, kanunay siyang mohimo og mga pamahayag sama sa “If you corrupt the youth, I will kill you.”
Ug kining mga pulong sa kanhi Presidente kay gidawat sa publiko.
Hinuon giangkon usab sa kadagkoan sa NBI nga nausab na ang panahon karon ug posibleng dili na madawat kining mga matang sa mga pulong nga napuno sa kapintasan ug gikinahanglan na ang kalinaw.
Ang opisyal nihimo sa pamahayag taliwala sa mga panawagan sa NBI nga mohimo og imbestigasyon, sama sa gihimo ni VP Sara nga nakigsulti na siya sa usa ka tawo nga mopatay sa unang magtiayon ug House Speaker Martin Romualdez kon mapatay siya.
Apan ang kadagkoan sa NBI nagkanayon nga ang mga Senador na ang mopasaka og reklamo kung gibati sila og hulga.
